الأربعاء، 28 أغسطس، 2013

تجربتى مع سوق العمل بعد التخرج

السلام عليكم



الموضوع دا ممكن يفيد ناس كتير من اللى لسا متخرجين زى حالاتى

فلاش باك ونبتدى من الاول خالص

انا من اسكندرية خريج معهد ابوقير(بكالوريوس نظم معلومات ادارية)

من ايام الامتحانات حتى قبل ما اخلص كنت بقدم لشغل وقولت عشان اول ما اخلص امتحانات ابتدى تانى يوم علطول.. الحماس واخدنى بقى هخلص دراسة اخيرا

ومكنتش حاطط فى دماغى ورق ولا جيش ولا شهادة تخرج ولا حاجه

قدمت فى اكتر من مكتب دعاية واعلان عشان اشتغل ديزاينر

وقدمت فى شركة مبيعات كمبيوتر كبيرة كانو طالبين ناس من كام شهر

ومنهم اللى خد السى فى وقالى هنكلمك ومنهم اللى قالى مش عايزين اصلا

وبعدين لما خلصت امتحانات كنت بدور فى النت كتير واكتشفت مجال الكول سنترز

اول حاجة لقيتها تقريبا كانت اسناد.. دخلت عالموقع بتاعهم وعملت apply

وبعده فى نفس اليوم لقيت ناوس NAOS تقريبا على المنتدى هنا

دخلت الموقع بتاعهم وبردو عملت apply

لقيت فى اخر التسجيل مكتوبلى اختار ميعاد الانترفيو اللى يناسبك... علطول كدا؟؟

المهم اخترت ابعد ميعاد فى المواعيد المتحدده كان يوم 18/6 تقريبا

وفى الوقت دا قريت كتير عن الشركة وعن الانترفيوهات.. واتعرفت على واحد ابن حلال اسمه محمود وهو هنا فى المنتدى بردو

هو كان قدم واتقبل قبلى بس لسا مبتداش تدريب واتفقنا لو اتقبلت هناخد شقة مع بعض او نشارك ناس تانيين كمان

وروحت الانترفيو وكان امتحان الانجليزى والاى كيو فى الاول سهل جدا خلصته قبل الناس اللى معايا بكتييييير

وبعدين دخلنا انترفيو مع الـHR وكنا 4

فضلت تسالنا بالترتيب واحد تسئلة كل الاسئلة مرة واحده وتنقل على اللى بعده

الناس اللى معايا كان الانجليزى بتاعهم ضعيف جداااا, لما جا الدور عليا اخر واحد كنت متوتر وبقف فى نص الكلام كتير.. مش اول انترفيو فى حياتى بس اول انترفيو لشغل دوام كامل وبالانجليزى كمان

المهم 3 مننا اتقبلو وواحد مكانش عارف حتى يكون جملة بالانجليزى دا اترفض

قالتلنا جهزو ورقكم والتدريب ميعادة هيتبعت عالميل

وهيتبعتلكم ميل تانى فيه كل الورق المطلوب

لما رجعت اسكندرية وانا مبسوط انى اتقبلت وشوفت الايميل اللى اتبعتلى من الشركة

ان التدريب هيبدا يوم 24

والورق المطلوب كان فيه شهادة اعقاء او اداء الخدمة العسكرية وشهادة التخرج

وانا مكانش معايا الاتنين

بعتلهم ميل قولتلهم الورق هياخد وقت انى اجهزو.. راحت مكلمانى عالموبايل وشرحتلها انى لسا مجيبتش ولا دى ولا دى.. قالتلى قدامك اد ايه قولتلها حوالى شهر

وقالتلى لما تجهز ورقك هنبقى نحطك فى مجموعة تدريب تانية

وبعد ما كنت هبتدى شغل خلال ايام بقيت رايح جاى عالسجل المدنى والجهات الحكومية عشان استخرج القيد العائلى واخد الاعفاء.. دا غير شهادة التخرج اللى لا كانت هى طلعت ولا النتيجة طلعت اصلا

وفضلت حوالى شهر فى مشاوير استخراج المستندات دى

وفى خلال الشهر دا قدمت فى كول سنترز تانيين كتييييييير

قدمت فى تيلى بيرفورمانس على بوزيشن اوف شور

كلمونى عالموبايل وعملو معايا انترفيو ابتدى بالسؤال المعتاد introduce yourself

انا مكنتش محضر حاجه فى دماغى ومتوتر جدااااااااااا ومعرفتش اقول كلمتين عدلين رغم ان الانجليزى بتاعى كويس جدا بس الرهبة قفلتنى

وقالى please work on your fluency

وغيرة وغيرة قدمت فيهم وكل الانترفيوهات اللى عالتليفون لاكاونت اوف شور كنت مش بتقبل فيهم

والحاجات اللى جوا مصر سهلة جدا ومفيش حاجه جوا مصر متقبلتش فيها فى الفون انترفيو

بس انا كدا كدا كنت لسا بخلص ورقى والانترفيو دا مجرد خطوة مش هقدر اخد بعدها اى خطوات غير لما اخلص الورق.. وفى الانترفيوهات شوفت ناس كتير عندهم نفس مشكلتى.. متخرجين ولسا مخدوش الشهادة... كتير جدا!

روجت مصر لشركة تانية اعمل انترفيو لاكاونت فودافون انجلترا وبعد الانترفيو رجع فى كلامة وقالى لا انت الانجليزى بتاعك مينفعش مع دول انت تشتغل فى فودافون بمرتب 800 جنية ايه رايك

قلبته طبعا وهو كان مجرد مكتب توظيف تقريبا الكول سنتر اللى هشتغل فيه كان مش تبعة

وفضلت فى موال الانترفيوهات دا وخلصت ورق الجيش بتاعى وخدت الاعفاء بعد عذاب

وبعدين مرة طلع فى دماغى ابعت السى فى لاكسيد واعدت ادور ملقيتش غير ايميلات قديمة بعتت عليهم كلهم

واتصلو بيا بعد حوالى اسبوع.. بنت من الHR فريندلى جدا فى كلامها عملت معايا انترفيو فى التليفون

كنت ساعتها حفظت الاسئلة اللى بتتسئل من كتر الانترفيوهات اللى عملتها والكلام كان حاضر فى دماغى

ولاول مرة اتقبلت وقالتلى عندك انترفيو فى القرية الذكية يوم الاحد مع دينا ادم

ودا كان اول اكاونت اوف شور اتقبل فيه .. اكاونت DU الامارات وشغلة اغلبة مع عملاء بالانجليزى

روحت الانترفيو وعلى عكس الانترفيوهات التانية دا الناس اللى كانت داخلة معايا الانترفيو كان شكلهم كانهم جايين يشتغلو سفراء.. وبيهزرو مع بعض بالانجليزى وكدا

دخلنا الاول التست اللى عالكمبيوتر

وبردو انا اول واحد خلصت

كان تست طويل جدا.. الاول بياناتى الشخصية

وبعدين اختبار typing عشان يعرفو سرعة كتابتك عالكيبورد

وبعدين اختبار للصبر اختيارات وكدا و3 اختبارات انجليزى متدرجين فى الصعوبة

بس الحمدلله كله انجزت فيه

وبعدين اعدت برا حوالى ساعة لحد ما الباقى خلصو

ودخلو 4 مننا الانترفيو مع بعض

وكان اللى بيعملو الانترفيو 2 اتش ار وواحد تالت متكلمش غير قليل جدا

فى واحدة من اللى دخلو معانا لما قالولها اتكلمى عن نفسك قالت انها بتحب twilight والحب ممكن بين مصاص دماء وانسانة وكانت شوية وهتحكيلهم الفيلم.. وهى عندها 29 سنة واول مرة تشتغل

على الجانب الاخر كان فى واحده خريجة اداب انجليزى ودى كانت بتجاوب كويس جدا والانجليزى بتاعها كويس بردو

والاتنين التانيين انا وواحد تانى

التانى دا قالتله اقنعنى انى ادخن واشترى منك سجاير

عشان تشوف قدرات الاقناع عنده.. قالها لا التدخين غلط

اعدت تفهمة ملكش دعوه غلط غلط بس اقنعنى هو مفيش فايدة قالها غلط واعد يضحك بصوت عالى

بوظلى اعصابى بصراحة عشان كان واضح انه بيضحك لانه مش عارف يقول حاجه

وانا اجاباتى كانت عادية.. يعنى انا كنت عارف ان الهدف الاول انها تعرف انى بتكلم انجليزى كويس

فبعدت عن المواضيع المعقده وخليتنى فى الاجابات الروتينية المباشرة بما ان الهدف مش فحوى الاجابة

وبعد ما خلصنا قالولنا استنو برا

الاول طلعت ونادت على البنت بتاعت مصاصين الدماء والولد اللى مش بيحب التدخين

وكلمتهم وبعدين مشو.. عرفت ان دول اترفضو.. فقولت يبقى انا والبنت التانية اتقبلنا بما انها منادتش علينا

بعدها بشوية نادت عليا انا بس وقالتلى انت اتقبلت.. بس فى اكاونت inbound

انا كنت فاهم ان الـ inbound دى يعنى اكاونت تانى جوا مصر

وقولت كدا يبقى عملت معايا زى بتاع فودافون

وقالتلى هنتصل بيك لما يبقى فى مكان فى ال inbound

وانا من يوميها وقولت دى حولتنى جوا مصر زى الباقى

والحقيقة اللى اكتشفتها بعدها بحوالى شهر ان inbound دى يعنى اكاونت دو وانجليزى بردو وكل حاجه

بس برد على العملاء الحاليين كخدمة عملاء مش بستقطب عملاء جداد ولا ببيع حاجه لناس مش عملاء اصلا

يعنى طلعت حاجه كويسة :D ونفس المرتب

المهم يعنى انا مكنتش عارف الكلام دا كله.. وروحت اسكندرية وانا زعلان

وكل دا ولسا مخدتش شهادة التخرج بتاعتى

فكنت مستنى اخد شهادة التخرج واتصل بـ NAOS واشتغل معاهم وخلاص بما ان مفيش امل فى الاوف شور

وبعدين من كام يوم لقيت اكسيد اتصلو بيقولوى عندك انترفيو مع الـ Account Manager بتاع دو

دو تانى؟؟؟؟ ازاى وانا اترفضت فيها

وطبعا مش فاهم ان inbound مش معناها اترفضت

المهم اتبسطت جدا وروحت تانى انترفيو

كنت المرادى انا الوحيد اللى فى اكاونت دو وفضلت مستنى حوالى تلات ساعات ونص لحد ما دخلت الانترفيو

اتسالت نفس الاسئلة بالظبط

والاكاونت مانجر دا كان اسمه مستر عماد.. راجل كبير بس بردو طريقته فى الكلام ودوده جدا

والاتش ار كانت قايلالى انه هيكشر وفعلا اول ما دخل كان ضارب بوز وبيكلمنى بحزم كدا

بس فى نص الانترفيو ابتسم فحسيت انى ماشى صح

وفى اخر الانترفيو من غير ما اطلع برا الاتش ار بصتله فحرك راسة بالايجاب

قالتلى انت تفضل اكاونت inbound ولا outbound

انا فاهم ان الاوفشور يعنى outbound فقولتلها outbound بس لو inbound مش هقول لا

هى قالتلى اللى عندنا متاح دلوقتى inbound بس

قولت ايه الهبل دا عاملنلى انترفيو مع واحد من دو وفى الاخر تقولى انبوند

قولتلها ماشى وقالتلى استنانى برا

وبعدين لما طلعت شرحتلى ان الinbound زى التانى بالظبط ونفس المرتب بس بياخد مكالمات العملاء الحاليين

من غير ما تعرف طبعا انى فاكره اكاونت جوا مصر

وقالتلى عالورق المطلوب والمرادى شبه جاهز

وهبتدى تدريب ان شاء الله يوم 15/9





لما افتكر الكام شهر دول من اولهم واتخيل لو كنت اتقبلت فى حاجه من الحاجات اللى قدمت ليها فى الاول خالص كان زمانى شغال فى اسكندرية بـ600 جنية فى الشهر ولا حاجة

التاخير بتاع الشهادات دا خلانى اشوف فرص احسن

طولت انا ... ربنا يوفقكم ان شاء الله وتلاقو الشغل اللى يناسبكم

dvd4arab

G+

ليست هناك تعليقات:

إرسال تعليق